'k Was nog te jonk om die te kennen
Nog veuls t'r klaain om die te zain
'k Wait dingen van die, van heuren zeggen
Wat men zo zegt in 't algemain
Wast doe goud, wast doe slecht
Of zat 't ter tussen in
't Begroot mie zo dat 'k die nait ken

Ik ken die allint van 'n foto op bozzem
Ik ken die allint van 'n petret
Wie mit ons baaide, hest mie bie d'haand
'k Ken die allint van boetenkaant

Ik kiek die aan, mor 'k wor nait wiezer
'k Proat tegen die, kikst en blifst stom
Heb ik dien hoar of kleur van d'ogen
Wat vrouger was, komt nait weerom
Is 't goud, of is 't slecht
Of zit 't ter tussen in
't Begrot mie zo dat 'k die nait ken

Woarst doe aan dochst, kin ik nait waiten
Blifst zo ast blifst, dien tied staait stil
En dien petret wordt aal wat geler
Mor verder is der gain verschil
Is 't goud, of is 't slecht
Of zit 't ter tussen in
't Begroot mie zo dat 'k die nait ken