Di Eagle and di Bear a keep a living in fear
Of the impending nuclear warfare
But as a matter of fact believe it or not
Plenty people don't care whether it imminent or not
Or who di first one to attack or if the human race
[aba] survive or not
For those whom is aware
Them life already coming like a nightmare

And you can see it everywhere
The famine and the fear
The doubt and the drought
Desperation and despair
And you can see it all around
The massacres abound
Dead bodies all around
The atrocities abound
Missing persons can' t be found
Dictators get dethroned
New clowns are quickly found


Sowshallism
is a wise ole shephad
im suvvie tru flood
tru drout
tru blizad

somme people seh
im a two hundred an odd years ole
addah people seh
notn noh goh soh
dat im a jus seventy odd years ole
some seh im is a ghost
some seh im is a sage
but nohbady noh really know
im riteful age ar whey im come fram

fateful is im flock
from di ewe to di ram to di Iam
rite tru tick an tin
dem mostly cling to im
awftah all
noh im guide an sheltah an proteck dem ?
( sometime a dem haffi proteck im dow
like ow a dem haffi proteck im now )

look ow im stretch out pan im back
pan di brown grass
di white hair pan im branze hed
like a kushan gense di weepin willow tree
lookin bedraggled an tin
like seh life done wid im
like seh im is totally at peace widin

noh baddah goh feel sarry fi im
ar goh tink poor ting
nat a ting noh dhu im
all dat really happn
is dat due to di heat a di time
like lickle bwoy blue im drap asleep
an a dream bout lickle bow peep

an wan an two a im flock dem drif a way
while di addah ism dem
jus a watch an a peep
jus a crawl an a creep
an noh baddah ask if dem naw mek fun
fi canfuse an cansume all di stray dem

but evryting is jus fi a time
soon di flack wi tek a stack an surmise
ow far fram di fole dem a stray
wen dem site ow di pack jus a staak dem
dem wi come back togeddah wance agen
an shephad di sage to a highah graun
whichpawt di graas is greenah an sweetah
whichpawt di breeze blow is like a balm
whichpawt di stream run quietah an coolah
whichpawt life can pleasant can be calm


mi revalueshanary fren is nat di same agen
yu know fram wen ?

fram di masses shata silence
staat fi grumble
fram pawty paramoncy tek a tumble
fram Hungary to Poelan to Romania
fram di cozy cyassle dem staat fi crumble
wen wi buck-up wananada in a reaznin
mi fren always en up pan di same ting
dis is di sang im love fi sing :

Kaydar
e ad to go
Zhivkov
e ad to go
Husack
e ad to go
Honnicka
e ad to go
Cauchescu
e ad to go
jus like apartied
wi av to go

awhile agoh mi fren an mi woz taakin
soh mi seh to im :

wat a way di eart a run nowadays, man
it gettin aada by di day
fi know whey yu stan
cauz wen yu tink yu deh pun salid dry lan
wen yu cteck a stack yu fine yu ina quick-san
yu noh notice ow di lanscape a shiff
is like valcanoe unda it an notn cyaan stap it
cauz tings jusa bubble an a bwoil doun below
strata seperate an refole
an wen yu tink yu reach di mountain tap
is a bran-new platow yu goh buck-up

mi revalueshanary fren shake im ed an im sigh
dis woz im reply :

Kaydar
e ad to go
Zhivkov
e ad to go
Husack
e ad to go
Honnicka
e ad to go
Cauchescu
e ad to go
jus like apartied
wi av to go

well mi nevah did satisfy wid wat mi fren mek reply
an fi get a deepa meanin in di reaznin
mi seh to im :

well awrite
soh Garby gi di people dem glashnas
an it poze di Stalinist dem plenty prablem
soh Garby leggo peristrika pan dem
canfoundin bureacraetic strategems
but wi haffi face up to di cole facks;
im also open up pondora's bax
yes, people pawa jus a showa every awa
an eyrybady claim dem demacratic
but some a wolf an some a sheep
an dat is prablematic:
nah tings like dat yu woulda call dialectic ?

mi revalueshanary fren pauz awhile an im smile
den im look mi in mi eye an reply :

Kaydar
e ad to go
Zhivkov
e ad to go
Husack
e ad to go
Honnicka
e ad to go
Cauchescu
e ad to go
jus like apartied
wi av to go

well mi couldn elabarate
plus it waz gettin kinda late
soh in spite a mi lack af andastandin
bout di meanin a di changes in di eas
fi di wes nonediless
an aldow mi av mi rezavayshans
bout di cansiquenses an implicashans
espehsaally fi black libaraeshan
to bring di reaznin to a canclushan
ah ad woz to agree wid mi fren
hopein dat wen wi meet up wance agen
wi coulda av a more fulla canvahsaeshan

soh mi seh to im, yu know wat ?
im seh wat ? mi seh :

Kaydar
e ad to go
Zhivkov
e ad to go
Husack
e ad to go
Honnicka
e ad to go
Cauchescu
e ad to go
jus like apartied
soon gaan