Op schoele vol e niet arg op
Det Dreentse jonggie Brammegie
Hij was een beetie stille
Mar zien cijfers waren goed
Hij speulde miest mit Roef en Harm
Mit Jintie en mit Lammegie
Hij meuk ook wel ies ruzie
Wat aw allemaol wel doet
En toen hij al wat older was
Toen vol zien oog' op Lammegie
Mar 'n Jeude en een Christelijke
Kun niet mit fesoen
De meensen zeden: "Lammegie, Lammegie
Lammegie, Lammegie, niet doen"

Ze deu zo as het heurde
En een aander trouwde Lammegie
De oorlog en de armoe
Troffen alle meensen grof
Haost iederien' leup deuken op
En ieder kreeg wel schrammegies
Harm wordde NSB-er zolfs
En Roef mus hen de Mof
En Jintie neide gele steerns
Op alle goed van Brammegie
Mar meer kun ze niet veur hum doen:
Ze zorgde veur heur moe
Naor Lammegie wol Brammegie, Brammegie
Brammegie, Brammegie niet toe

Wij weet wat of wij meensen doet
Wij veegt oens eigen dammegie
En aj een Jeude holpen
Nou, dan kund' ie er veur bloen
Een NSB-er uut een vromde stad
Die haalde Brammegie
Want iene uut oens eigen dorp
Die zul det vast' niet doen
't Was nou gien Dreentse jonge meer
't Was nou de Jeude Brammegie
Elk en iene leut hum vallen en nou was e vort
Hij kwaamp ien Westerbork terechte
Brammegie, Brammegie
Auschwitz was zien lot.....