Þat ek þá reynda
er ek í reyri sat
ok vaettak míns munar
hold ok hjarta
var mér in horska maer
þeygi ek hana at heldr hefik

Billings mey
ek fann beðjum á
sólhvíta sofa
jarls ynði
þótti mér ekki vera
nema við þat lík at lifa

Auk naer apni
skaltu Óðinn koma
ef þú vilt þér maela man
alt eru óskǫp
nema einir viti
slíkan lǫst saman

Aptr ek hvarf
ok unna þóttumk
vísum vilja frá
hitt ek hugða
at ek hafa mynda
geð hennar alt ok gaman

Svá kom ek naest
at in nýta var
vígdrótt ǫll um vakin
með brennandum ljósum
ok bornum viði
svá var mér vílstígr of vitaðr

Ok naer morni
er ek var enn um kominn
þá var saldrótt um sofin
grey eitt ek þá fann
innar góðu konu
bundit beðjum á

Mǫrg er góð maer
ef gǫrva kannar
hugbrigð við hali
þá ek þat reynda
er it ráðspaka
teygða ek á flaerðir fljóð
háðungar hverrar
leitaði mér it horska man
ok hafða ek þess vaettki vífs

Heima glaðr gumi
ok við gesti reifr
sviðr skal um sik vera
minnigr ok málugr
ef hann vill margfróðr vera
opt skal góðs geta
fimbulfambi heitir
sá er fátt kann segja
þat er ósnotrs aðal