dis is di age of reality
but some a wi a deal wid mitalagy
dis is di age of science an 'teknalagy
but some a wi a check fi antiquity

w'en wi can't face reality
wi leggo wi clarity
some latch aan to vanity
some hol' insanity
some geet vision
start preach relijin
but dem can't mek decishan
w'en itcome to wi fite
dem can't mek decishan
w'en it comes to wi rites

man,
dis is di age af reality
but some awi a deal wid mitalagy
dis is di age af science an' teknalagy
but some a wi a check fi antiquity

dem one deh gaan outta line
dem naw live in fi wi time
far dem seh dem get sign
an' dem bline dem eye
to de lite a di worl'
an' gaan search widin
di dark a dem doom
an' a shout 'bout sin
instead a fite fi win
man,
dis is di age af reality
but some a wi deal wid mitalagy
dis is di age af science an' teknalagy
but some a wi a check fi antiquity

dis is di age af decishan
soh mek wi leggo relijan
dis is di age af decishan
dis is di age af reality
soh mek wi leggo mitalagy
dis is di age of science an' teknalagy
soh mek wi hol' di clarity
mek wi hol' di clarity
mek wi hol' di clarity